नेपाली जनसम्पर्क समिति कतार द्वारा आंतरिक भेटघाट तथा बृहत इफ्तार कार्यक्रम गर्दै

आशिक हुसैन शेख दोहा, कतार — इस्लाम धर्मावलम्बीहरूको पवित्र महिना रमजानको अवसरमा नेपाली जनसम्पर्क समिति कतारले आन्तरिक भेटघाट तथा बृहत् इफ्तार कार्यक्रम आयोजना गर्ने भएको छ। प्रवासमा रहेका नेपालीहरूबीच आपसी सद्भाव, एकता र सहकार्यलाई अझ मजबुत बनाउने उद्देश्यले कार्यक्रम तय गरिएको समितिले जनाएको छ।

समितिका अनुसार उक्त कार्यक्रम २०२६ फेब्रुअरी २७ तारिख शुक्रबार दोहास्थित गोर्खाली रेष्टुरेन्ट, मुन्ताजामा बेलुकी ४:०० बजेदेखि सुरु हुनेछ। कार्यक्रममा कतारका विभिन्न क्षेत्रमा कार्यरत नेपाली समुदायका अगुवा, समाजसेवी, बुद्धिजीवी, युवा प्रतिनिधि तथा विभिन्न संघ–संस्थाका पदाधिकारीहरूको उल्लेख्य उपस्थिति रहने अपेक्षा गरिएको छ।

आयोजक समितिले रमजान महिना केवल धार्मिक आस्था र उपवाससँग मात्र सीमित नभई आत्मअनुशासन, त्याग, सहिष्णुता र सामाजिक सद्भावको सन्देश दिने पवित्र समय भएको उल्लेख गरेको छ। सोही सन्देशलाई आत्मसात गर्दै प्रवासमा रहेका नेपालीहरूबीच भाइचारा र एकताको भावना अभिवृद्धि गर्न कार्यक्रम आयोजना गर्न लागिएको बताइएको छ।

कार्यक्रम अन्तर्गत सामूहिक इफ्तारका साथै आन्तरिक भेटघाट, शुभकामना आदान–प्रदान तथा समसामयिक विषयमा छलफलसमेत हुने जनाइएको छ। समितिले यस्तो कार्यक्रमले नेपाली समुदायबीच आपसी सम्बन्ध प्रगाढ बनाउन तथा सामाजिक समन्वय सुदृढ गर्न महत्वपूर्ण भूमिका खेल्ने विश्वास व्यक्त गरेको छ।

यसैबीच, समितिले कतारमा रहेका सम्पूर्ण नेपाली दाजुभाइ तथा दिदीबहिनीहरूलाई कार्यक्रममा उपस्थित भई कार्यक्रम सफल बनाउन आग्रह गरेको छ। प्रवासको व्यस्त जीवनशैलीबीच पनि यस्ता सामाजिक तथा धार्मिक कार्यक्रमले समुदायलाई नजिक ल्याउने र आपसी सहकार्यलाई सशक्त बनाउने अपेक्षा गरिएको छ।

कार्यक्रमलाई व्यवस्थित र भव्य रूपमा सम्पन्न गर्न आवश्यक तयारी तीव्र रूपमा अगाडि बढाइएको आयोजकले जनाएको छ।