सर्लाही प्रवासी सेवा समाज कतारको १२औँ अधिवेशन तथा १८औँ स्थापना दिवस मनाइँदै

आशिक हुसैन शेख दोहा, कतार । सर्लाही प्रवासी सेवा समाज कतारले आफ्नो १२औँ अधिवेशन तथा १८औँ स्थापना दिवस विशेष कार्यक्रमका साथ मनाउने भएको छ। समाजले नेपालीहरूको प्रमुख चाडपर्व विजय दशमी, दीपावली तथा छठ पर्व २०२६ को अवसर पारेर कतारमा रहेका सर्लाहीवासी नेपालीहरूबीच आपसी सद्भाव, भाइचारा, एकता र सामाजिक सम्बन्धलाई थप सुदृढ बनाउने उद्देश्यले शुभकामना आदान–प्रदान कार्यक्रम आयोजना गर्न लागेको हो।

समाजले “सर्लाही प्रवासीहरूको चाहना, सभ्य र सुन्दर समाजको स्थापना” भन्ने मूल नारालाई आत्मसात् गर्दै कतारमा रहेका सर्लाहीवासी नेपालीहरूलाई एउटै सामाजिक भावनामा जोड्दै आएको छ। स्थापना कालदेखि नै समाजले प्रवासी नेपालीहरूको हित, सामाजिक एकता, सहयोग, आपसी सहकार्य तथा नेपाल र नेपालीसँग सम्बन्धित विभिन्न सामाजिक गतिविधिमा आफ्नो भूमिका निर्वाह गर्दै आएको जनाएको छ।

यसै अवसरमा आयोजना हुने अधिवेशनले समाजको आगामी कार्यदिशा तय गर्नुका साथै नयाँ नेतृत्व चयन तथा संस्थाको भावी योजना निर्माण गर्ने महत्वपूर्ण अवसरका रूपमा समेत लिइएको छ। अधिवेशनमार्फत समाजलाई थप व्यवस्थित, सक्रिय र प्रभावकारी बनाउँदै कतारमा रहेका सर्लाहीवासी नेपाली समुदायको हितमा आगामी दिनमा अझ प्रभावकारी रूपमा काम गर्ने विषयमा छलफल हुने बताइएको छ।

त्यसैगरी, नेपाली समाजका महत्वपूर्ण पर्वहरू दशैं, तिहार र छठ नजिकिँदै गर्दा आयोजना गरिएको शुभकामना आदान–प्रदान कार्यक्रमले विभिन्न समुदाय, क्षेत्र र पृष्ठभूमिबाट कतारमा रहेका नेपालीहरूबीच आत्मीयता र सामाजिक सद्भाव बढाउन महत्वपूर्ण भूमिका खेल्ने अपेक्षा गरिएको छ।

कार्यक्रममा कतारमा रहेका सर्लाहीवासी नेपाली दाजुभाइ तथा दिदीबहिनीहरूका साथै विभिन्न नेपाली सामाजिक संघसंस्थाका प्रतिनिधि, समाजसेवी, व्यवसायी, पत्रकार तथा शुभेच्छुकहरूको सहभागिता रहने आयोजकले अपेक्षा गरेको छ।

समाजले कार्यक्रमलाई सभ्य, भव्य र सफल बनाउन कतारमा रहेका सम्पूर्ण सर्लाहीवासी नेपालीहरूलाई उपस्थितिका लागि आग्रह गरेको छ। साथै, कार्यक्रममा सहभागी भई आपसी भेटघाट, शुभकामना आदान–प्रदान तथा सामाजिक एकताको सन्देशलाई थप मजबुत बनाउन समाजले सबैमा अनुरोध गरेको छ।

कार्यक्रमको विवरण,आयोजक: सर्लाही प्रवासी सेवा समाज कतार

कार्यक्रम: १२औँ अधिवेशन तथा १८औँ स्थापना दिवस विशेष अवसर: विजय दशमी, दीपावली तथा छठ पर्व २०२६ को शुभकामना आदान–प्रदान

मिति: २५ सेप्टेम्बर २०२६, शुक्रबार

समय: दिउँसो ३:०० बजे

स्थान: जिम्नू थकाली रेस्टुरेन्ट, प्लाजा मल, सनैया, कतार

सर्लाही प्रवासी सेवा समाज कतारले प्रवासमा रहेका नेपालीहरूबीच आपसी सद्भाव, भाइचारा, एकता र सहकार्यलाई प्राथमिकता दिँदै संस्थागत गतिविधिलाई निरन्तरता दिने प्रतिबद्धता जनाएको छ। संस्थाको १२औँ अधिवेशन तथा १८औँ स्थापना दिवसले समाजको आगामी यात्राका लागि नयाँ ऊर्जा र नयाँ कार्यदिशा प्रदान गर्ने विश्वास गरिएको छ।

सर्लाही प्रवासीहरूको चाहना, सभ्य र सुन्दर समाजको स्थापना।