रसुवा नुवाकोट बाढीपीडितका लागि सप्तरी सेवा समाज कतारद्वारा रु. २ लाख ३५ हजार ३० सहयोग।

आशिक हुसैन शेख दोहा, कतार । रसुवा तथा नुवाकोट जिल्लामा आएको बाढीबाट प्रभावित परिवारको राहत तथा सहयोगका लागि सप्तरी सेवा समाज, कतारले कुल रु. २ लाख ३५ हजार ३० (रु. २,३५,०३०) सहयोग गरेको छ।

प्राकृतिक विपत्तिका कारण प्रभावित भएका परिवारलाई राहत उपलब्ध गराउने उद्देश्यले कतारमा रहेका सप्तरीवासी नेपाली तथा सहयोगी मन भएका नेपाली दाजुभाइ–दिदीबहिनीहरूको सहभागितामा सहयोग रकम संकलन गरिएको समाजले जनाएको छ। बाढीका कारण प्रभावित परिवारको दैनिक जीवनमा परेको कठिनाइलाई मध्यनजर गर्दै मानवीय सहयोगस्वरूप उक्त रकम उपलब्ध गराइएको हो।

सप्तरी सेवा समाज, कतारका अध्यक्ष अन्वारुल हकले महोत्तरी टुडेलाई जानकारी दिँदै रसुवा–नुवाकोटका बाढीपीडितको दुःखमा साथ दिन समाजले आफ्नो तर्फबाट सहयोग अभियान सञ्चालन गरेको बताए। विपद्को समयमा पीडित नागरिकलाई सहयोग गर्नु सबैको सामाजिक तथा मानवीय दायित्व भएको उल्लेख गर्दै उनले सहयोग अभियानमा जोडिनुहुने सम्पूर्ण सहयोगदाता तथा समाजका सदस्यहरूप्रति धन्यवाद व्यक्त गरे।

अध्यक्ष हकका अनुसार कतारमा रहेका नेपाली समुदायबीच आपसी सहयोग, एकता र सामाजिक उत्तरदायित्वलाई थप मजबुत बनाउने उद्देश्यले पनि समाजले यस्ता मानवीय अभियानलाई प्राथमिकता दिँदै आएको छ। विपद्को समयमा पीडित परिवारलाई आवश्यक राहत उपलब्ध गराउन सकियोस् भन्ने उद्देश्यले सहयोग रकम संकलन गरी सम्बन्धित राहत अभियान/कोषमार्फत उपलब्ध गराइएको उनले बताए।

सप्तरी सेवा समाज कतारले बाढीपीडितका लागि सहयोग रकम जुटाउने क्रममा प्रत्यक्ष तथा अप्रत्यक्ष रूपमा साथ दिने सम्पूर्ण सहयोगदाता, समाजका पदाधिकारी, सदस्य तथा शुभेच्छुक नेपाली समुदायप्रति आभार व्यक्त गरेको छ।

समाजले विदेशमा रहेर पनि नेपालमा आइपर्ने प्राकृतिक विपत्ति तथा मानवीय संकटमा आफ्नो क्षमता र स्रोतअनुसार सहयोग गर्दै आएको जनाएको छ। रसुवा–नुवाकोटमा बाढीबाट प्रभावित नागरिकको पीडा कम गर्न सानो भए पनि सहयोग पुग्ने विश्वास समाजले लिएको छ।

सप्तरी सेवा समाज, कतारबाट रसुवा–नुवाकोट बाढीपीडितका लागि उपलब्ध गराइएको कुल सहयोग रकम रु. २,३५,०३० रहेको अध्यक्ष अन्वारुल हकले जानकारी दिए।